My blog..

Monday, April 14, 2008

أفكار لتونس: اقتراحاتي مادامني شاب

أيا بربـّي قبل ما نخلط للتلاثين و نولـّي نتحسب من جملة الشيـّاب، خليني نقدم مقترحات بسيطة لتونس كيما نحب نراها دولة متقدمة و مجتمع حر بالفم والملا. قاعد نخمـّم بصوت عالي راني و خواطري ماهيش منظـّمة.. معناها رؤوس أقلام و براه

أيـّا سيدك، المبادئ هوما هوما: الحرية، النظام، العدل. يحب يقول: حق الإختيار و دولة القانون و تكافؤ الفرص. يحب يقول:ل

أقل أداءات على المداخيل

حذف بطاقات التعريف و مراقبة الهوية. معاقبة الجرايم الخفيفة بالعمل المجاني الموجه لفائدة المجموعة. إلغاء عقوبة الإعدام وتعويضها بالمؤبد. التعامل بكل حزم مع إلي يستعملوا العنف اللفظي والبدني ،كبار و صغار، ومع إلي يسوقوا سكرانين و يعرضوا حياة غيرهم للخطر

إدراج اللسان التونسي في المناهج التعليمية: نحو و صرف و حضارة تونسية مالسنة لولى ابتدائي. الانقليزية والفصحى مالسنة الثالثة و الفرنساوية مالسابعة. تدريس العلوم بالانقليزية

تكريس الفكر النقدي والحس الحضاري في التعليم الأساسي و الثانوي. الفلسفة مالسنة الأولى ثانوي و ضارب أربعة. التربية المدنية ضارب خمسة. إلغاء الشـّعب. إلغاء مناظرة الباكالوريا و التوجيه و ترك مسؤولية الاختبار والانتقاء للجامعات . قروض جامعية من غير فايدة من عند الدولة للي يستحق مع إستردادها بعد التخرج و التوظيف. منح للي يستحق لأسباب اجتماعية قاهرة أو لتميـّزو

المخطط حداش آخرهم: إنهاء التوجيه الاقتصادي على الطريقة السوفياتية

التعهد بتخفيض عدد الوزارات وكتابات الدولة للنصف على الأقل في الخمسة سنين الجايين وياحبذا للربع. التعامل بكل حزم مع الموظفين المتقاعسين ومع تبذير الموارد. تخفيض المديونية العامة بترشيد الإنفاق
.
ديبلوماسية ("آفاريات برانين" بالتونسي) مقدامة و مسموعة. قنصليات منظمة وعندها مواقع واب تتواصل مع الجاليات بواسطتها. الانقليزية لوغة التخاطب الأولى مع البلدان الأجنبية والإعلام. المساندة التامة لحق الشعوب المضطهدة في الوجود. دفع عملية السلام في الشرق الأوسط والصحراء الغربية و تنظيم لقاءات بين القيادات في تونس. مقاومة العنصرية و حماية الأقليات الأمازيغية والسود في البلدان المغاربية من القمع والتمييز

محافظة المرا على اسم بوها بعد العرس في كل الأحوال. فصل الملكية بين الزوجين في كل الأحوال. صفر تسامح مع الجرايم الموجهة ضد الصغار

تعاون مخابراتي مغاربي وثيق. سوق مغاربية مشتركة ودمج للشركات الكبرى. حرية التنقل والشغل بين البلدان

إرجاع الدين لمكانو الأصلي: الفرد موش الدولة و التحليل الفقهي لمكانو الطبيعي: الجامعة موش الرديون. المساواة بين الجنسين في الميراث مالم يوص المورث خطيا قبل وفاتو باعتماد التقسيم الإسلامي أو أي تقسيم آخر

حماية الحيوان مالانتهاك: ذبيحة العيد اتتم في مكان خاص يشرف عليه طبيب بيطري. كل شخص يفرض على جمل أنو يعدي حياتو يدور في حلقة يتعاقب. شحن الدواب ونقلها من مكان لآخر يتم بطريقة إنسانية موش بالهمجية. الحيوانات السايبة تتلم و تتداوى

اسم البلاد بالعربي و بالسوري جمهورية تونس موش تونيزي. عاصمتها قرطاج

علاقات صداقة مع بلدان العالم الكل مع حماية الشخصية التونسية مالتهميش والتعريف بيها في الخارج بخلق المجلس الثقافي التونسي

دفاع قوي و متكون على أحدث التقنيات وفي مقدمة قوات حفظ السلام في العالم. الخدمة العسكرية إختيارية

تعصير الإدارة و إدراج الانقليزية كلغة للاستعمال التجاري و تقييم دوري لآداء سفاراتنا وبعثاتنا في الخارج. فتح المحلات التجارية كامل أيام الأسبوع حتى نص الليل و أزيد. إعادة النظر في نظام الحصة الواحدة بتعيين خبراء يبحثوا طرق أخرى لتنظيم العمل وقت السخانة ورمضان من غير تعطيل لمصالح العباد

انترنات سريعة و رخيصة، و بالتالي مدارة كليا مالقطاع الخاص. التفويت في كل الشركات إلي قاعدة تخسر و تفرض على حرفاها في أسعار عالية وتمص في فلوس المستحق في صيغة دعم حكومي (وأولها الخطوط التونسية) للقطاع الخاص

توفير حضانات للصغار في كل مواقع العمل

قوانين صارمة تحمي الملكية وتقاوم السرقة و القلبة والتكمبين.. فك نخبوية البورصة و التشجيع على المضاربة الشعبية على أوسع نطاق. فتح أنصاف رؤوس أموال الشركات الغير مؤهلة للخوصصة الكاملة (كيما الترينوات والفسفاط والفولاذ) للأفراد وأولهم الناس إلي يخدموا في الشركات هاذي

إلغاء منظومة السيارات الشعبية فورا والاستثمار في نقل عمومي عصري و نظيف. فرض أداء عالي عالسيارات إلي تدخل لقلب العاصمة. تخصيص أروقة للبسكلاتات. تهيئة النقل طبقا لحاجيات المعوقين

الخروج نهائيا من التبعية الاقتصادية لأوروبا القارية و تمتين علاقاتنا مع الصين والهند و والولايات المتحدة و بريطانيا. إلغاء الأداء على إستهلاك المنتوجات الصناعية حتى لو كانت مستوردة

إخراج المناطق الداخلية من الظلمات: تقسيم البلاد إلى أربع مناطق إدارية وأربع ميزانيات مستقلة حسب حاجياتها من التمويل العمومي: قرطاج الكبرى، شمال، وسط ، جنوب. خروج الدولة من مسالك التوزيع بين الفلاحة والمستهلكين وإلغاء الرقابة على هوامش الربح. إعطاء الأولوية للمناطق الداخلية في مشاريع البنية التحتية والطرقات السريعة: صفاقس-قفصة و مساكن-القصرين أولى من قابس-راس جدير. أكثر ميكرو قروض و دروس مجانية في إدارة الأعمال للمستنفعين منها

ديمقراطية وشفافية و مسؤولية. مساءلة النواب والحكومة دوريا أمام أفراد الشعب في وسايل الإعلام الوطنية. استفتاء شعبي على كل قضية تهم السيادة التونسية. أكثر سلطة للبرلمان. وزير أول منتخب لفترة خمسة سنين تتجدد مرّة عالأكثر و رئيس يشرف على دستورية التشريعات

بيئة خضرا و نظيفة. بارك في كل حومة. معاقبة التسيـّب في استخدام الماء لري المساحات الخضرا في المدن في طمبك القايلة. أداء بعشرين مليم على شكاير كارفور و جيان و غيرهم. خطية للي يلوح كواغذو عالمادة و خطية للمعامل إلي تلوث في المحيط و حوافز ضريبية للصناعات النظيفة. تعميم الرسكلة و خطية للي ما ينظمش فضلاتو المنزلية بين قابل للتحويل و غير قابل

صفر رقابة عالإنتاج الثقافي. مكتبة ومركـّب سينمائي و مسرحي و رواق فنون في كل حومة. ضريبة عالية جدا على أرباح المقاهي و صالونات الشاي

سيـّاح متثقفين و عيـّاشة و سياحة راقية و مربحة

بلايك بالدارجة والانقليز. تسمية المدن بأسماءها الأصلية: جربة موش دجربة، نابل و توزر وسوسة موش نابول و توزور وسوس وإلي ثقلوا بنزت و حمام الأنف وحلق الواد على لسانو يسامحنا في شقاه أما هذاكا هو الموجود

***

أنا نوعد أي مترشح لاستحقاق العام الجاي أنو يضمن صوتي كان ينفذلي القايمة هاذي مالمطالب المستعجلة. والله نبصملو بالعشرة موش نفوتيلو برك

posted by Tarek at 21:45

17 Comments:

  • هذا يا طارق برنامج سياسي متاع حزب كبير
    .. يعطيك الصحّة

    By Blogger HNANI, at 10:04 PM  

  • two thumbs up!

    By Blogger Hannibal, at 10:24 PM  

  • afkar tahfouna :5/5,
    mais ya weldi yarham sidi fok aalina min hak el-yakaya kallou carthage capitale de la tunisie , rahou mouch normal cette histoire .
    voila la logique :
    -1- pays : tunisie
    -2- capitale : tunis
    ( que se soit en anglais ou en francais, comme tu veux, no problem men ) .

    donc la capitale de la tunisie est tounes .
    elle va rester tounes jusqua l'infini ...
    tounes, tunis, tounes , tunis , tounes ...., a votre choix bidderji ou en angalais .


    amicalment .


    ramzi .

    By Anonymous ramzi, at 12:38 AM  

  • ana madhabia nhellou hezb jedid m3a b3adhna ou nsammioueh : El Hezb ettounsi !

    By Blogger Zied, at 5:11 AM  

  • برافو أفكار هايلة في قالب بعضها...... أمّا بالشّويّة على جماعة الحوار مع الشّباب... برشا عليهم هكّا فرد مرّة... سايسهم شويّة
    :))

    By Blogger eddou3aji, at 6:29 AM  

  • صباح الخير ..

    طارق . علاش ما تسجّلش في منتدى الحوار مع الشباب و تدرج مقترحاتك غادي..

    نجّم ندرجها في بلاصتك إذا حبّيت مع رابط نحو تدوينتك..

    By Blogger ->> AntikoR <<-, at 8:08 AM  

  • أفكار ممتازة في مجملها يا طارق،

    فقط ملاحظة : المرأة راهي قانونيا تبقى محتفظة بلقب عائلتها بعد العرس، هاذاكا ريق متاع مادام فلان راهو العباد تستعمل فيه ولكن القانون ما فيه حتى إشارة لتغيّر اللقب بعد الزواج

    بالنسبة لتدخّل الدولة بين الموزّعين والفلاّحة ومراقبة الأسعار، هذا راهو المعمول بيه من عام 1991، أما الله غالب بعض الناس المسهولين على التجارة مازالو ما فهموش وباقي يحكيو على مراقبة الأسعار وغيرو من السخافات

    هيّا تترشّح إنتي خلّي نصوّتلك؟
    :)

    By Blogger Big Trap Boy, at 8:11 AM  

  • خليتني نحلم معاك يا طارق
    :))

    أما ما تخافش توه يجي شكون يقول لك أحنا كرب أحنا مستسلمين و في سبرنا و ما يخرجش علينا لا حرية لا ديمقراطية لا ليبرالية و العياذ بالله

    By Blogger exmouslem, at 9:31 AM  

  • هذا كان ما قالولكش اقتراحات متوسطة

    :)))

    By Blogger exmouslem, at 9:33 AM  

  • يعطيك الصحة يا طارق ... برنامج سياسي هايل ... أمّا كان يتعمل منهم حتى 50 فالميا حاجة هايلة ياسر و تعتبر إكسبلواااااااا

    By Blogger Bel Malwene, at 9:43 AM  

  • برنامج بالتن و زيت الزيتونة
    (consistant bel souri)

    من فمك الربي يا طارق

    By Blogger m0ntassar, at 10:12 AM  

  • hi tarek. is it a political agenda? I liked it. but I think that Sarkozy will never be ok with u ;)
    I will be the first person to stand for English language and good and strog relations with India, USa, UK but I do not think I am ok with China, may be Israel ;)

    By Blogger Legend Of The Fall, at 10:41 AM  

  • Tarek, tu dis tout haut ce que les tunisiens disent tout bas.. Je suis d'accord avec toi sur plusieurs points... pas sur certains.

    Je t'invite comme a dit antikor à poster tes idées au forum www.pactejeunesse.tn, ainsi qu'à tous ceux qui ont des idées pour la Tunisie.

    Hakka, au moins on ne nous dira pas vous avez eu la chance de parler directement (si ce n'est pas au gouvernement) au peuple si ignorant qu'il soit, et vous avez laissé cette chance..

    Pour que le forum ne soit pas pour approfondir le fossé du takhallof ! El kollha mas2ouleytana !

    Nassi7a : 7ot afkarkom 1 à 1 dans divers topics.. Khater ensemble, les idées se perdent !

    By Blogger Nizar Ben Romdhane, at 11:27 AM  

  • Afkar héyla bél jomla amma famma des points ou je suis pas d'accord avec toi comme l'abolition de la peine de mort.

    إلغاء منظومة السيارات الشعبية فورا والاستثمار في نقل عمومي عصري و نظيف

    Tout a fait d'accord avec toi avec l'annulation des subventions sur l'essence !

    By Blogger SAFOne, at 12:21 PM  

  • Des idées libérales importantes pour la Tunisie.

    Dommage qu'il n’existe pas un vrai parti politique qui porte ces valeurs sur la seine politique national.

    Si tu te présente avec ces idées au élection je voterais pour toi.

    Une place est à prendre sur l’échiquier politique. et il faut que quelqu’un y pense sérieusement a l occuper.

    By Anonymous Anonymous, at 4:42 PM  

  • برشاء أفكار حلوة وباااااارشاء أفكار مانيش موافقها

    على كل حال غجبتني فكرتك ياخي قلت نعمل كيفك و نشرت بعض الافكار متاعي

    مرحبا بالي يحب يعمل طلة و ينتقدني

    By Blogger علاش, at 2:14 AM  

  • هناك الكثير من الأفكار الجيدة

    بالمقابل، هناك بعض الأفكار التي لا تبدو لي واقعية (كل الأفكار المتعلقة بالإنسلاخ عن الهوية العربية لتونس و حكاية بطاقة التعريف و بعض الأفكار المتعلقة بالإقتصاد).

    تعليقي الوحيد على حكاية الهوية هو: من حقك أن تكون لك رؤيتك الخاصة حول هذا الموضوع، لكن ليس من حقك فرض هذه الرؤية على الأخرين عبر تغيير جذري لعدة جوانب من حياة التوانسة لأنها لا تتماشى مع رؤيتك، خصوصا إذا ليس هناك ما يوحي أن أغلبية التوانسة تتفق معك.

    بالنسبة للأفكار الأخرى التي لا تبدو لي واقعية والتي تتلخص كلها في إستراتيجية وحيدة : "عند وجود مشكلة ما، الحل الأوحد هو قطع كل الطرق المؤدية إلى هذه المشكلة." يعني بالفلاقي، في عوض نحلو المشكلة، نحاولو بشتى الوسائل (الردعية و الضرائبية) انو نمنعو المشكلة هذي من الوقوع أصلاً:

    - باش نتفاداو إستغلال الشرطة المشط لصلاحيتها، نلغيو بطاقة التعريف
    - باش نتفاداو مشاكل المرور في المدن الكبرى، نفرضو "أداء عالي عالسيارات إلي تدخل لقلب العاصمة"

    أولاً، حسب رأي، الحلول هذي حلول نصفية لن تلبث أن تجد من يدور حولها ويلغي فاعليتها و كيما يقول المثل "إلي يسرق يغلب إلي يحاحي".

    ثانياً، حسب رأيي، مبدأ "الوقاية خير من العلاج" لا يجب الإفراط فيه بالنسبة للمجتمعات. الدولة السليمة ليست الدولة الخالية تماماً من المشاكل والفاقدة للمناعة والعايشة عالحرابش (القوانين الردعية) ونهارة اللي تجيها مشكلة جديدة من حيث لم يتوقع أحد، تمشي بشطرها قبل ما يفيقوا و يطلعوا قوانين ردعية جديدة. الدولة السليمة، حسب رأيي هي الدولة التي تتعلم من مشاكلها وتستنبط حلول مبنية على تجربتها وتجربة غيرها كلما واجهت مشكلة جديدة والتي ليس هدفها الأسمى هو منع المشاكل من الوقوع، بل التعامل معها وحلها، ساعات عن طريق قوانين و ساعات أكثر عن طريق تطوير المجتمع باش المشكلة تولي إما مستحيلة الوقوع أو عديمة الآثار إن وقعت و بالتالي معادش مشكلة.

    By Blogger Bechir, at 10:28 AM  

Post a Comment

<< Home