الهوية التونسية، مرة أخرى

قريت مقال في جريدة الصباح كتبو أستاذ الإجتماع محمود الذوادي و جرالي ما جرى لنادية آك النهار: قصـّيت على فطوري و نطقت من جنابي

ملخـّص المقال إلـّي تونس عربية إسلامية أولا و آخرا و نغلطوا كان نعملوا حساب للجانب القرطاجي الفينيقي على خاطرو ملموس في الحجر بركة موش في اللوغة والدين

.

زعمة؟

أولا فرضية أنو قومية العبد مصدرها لوغتو و دينو غالطة. الهوية البريطانية إلي استشهد بيها أستاذنا ما فيهاش كان البروتستانية واللوغة الانقليزية. فمـّة بوليسية يلبسوا عمامة الهنود و ماجا حد قاللهم شبيكم ماكمش بروتستانيين. قـّراتني أستاذة بريطانية للنخاع تولدت وكبرت هنا ورغم هذا ما تلبس كان الساري. الناس إلي يعيشوا في كارديف واحدة من أكبر المدن البريطانية ما يتكلموش أنقليز. القومية هنا أساسها تلاثة حاجات: الملكية بفتح الميم و كسرها والحريات الفردية، موش التمازج الديني واللغوي
.

نحب نفكـّروا زادة إلي اللوغة الفينيقية كيفها كيف العربي، لوغة سامية، يعني ماناش ننكروا في أصلنا كيف نقولوا إلي أحنا فينيقيين بل بالعكس نأكـّدوا عليه. هذا من ناحية. ومن ناحية أخرى نحب نفكـّروا إلـّي الأساطير والخيال الشعبي وأساليب التخاطب التونسي فيهم المكون العربي الإسلامي ما فمـّة حتى شك، أما فيهم زادة برشة حاجات لاعربية و لا إسلامية: الخمسة وڨرن الغزال ما جابهمش عقبة بن نافع في ساك و علـّقهملنا عالبيبان. صبـّان الماء ورا المسافر تطيـّر متوسطي دخـّلوه الرومان. حضور المرا الكبير في القرارات العايلية و مناداة الراجل ب"إنتي" حاجة ترجع جذورها للفينيقيين والبربر إلـّي كان مجتمعهم ماترياركال يقدس الأنوثة. اتفرجوا على رقصة شعبية تونسية و قولولي كان الحركات متاعها فيها تأثير إفريقي ولا أنا بركة يستخايلي. كلمة صباط عربية؟ كرهبة، زغزغ، علوش، فيشتا، سبيطار، منين جاو زعمة؟

أيه و مافيها باس نتذكروا إلي الشكشوكة متاعنا تصنيف يهود، كيفها كيف الكسكسي بالحوت

أنا واحد مالناس فخور ياسر ياسر ياسر بالتاريخ متاع بلادي بمكوناتو الكل ومانحبـّش شكون يلخـّصو في كلمتين، عربي-إسلامي. نحب جامع الزيتونة وفسقية القروان بالضبط كيما نحب مسرح الجم وحنايا زغوان و حصن قليبية و معبد الغريبة ودار الثقافة متاع منزل بورقيبة إلي أصلها كنيسية كاتوليكية عييت نقرى فيها وأنا صغير ونسرح في المعمار متاعها. نحب الكلام التونسي..نحب نسمع حكايات العروي و نتفرج في الكوميسار و نقـّار الزهواني و نفسـّر لزميلي من بلاد عربية أخرى فاش قاعدين يقولو بهاللوغة الغريبة عليه. تاريخنا هذا، حضارتنا ياديني وأحنا شكون. تحبـّوا ولا تكرهوا كل تونسي فيه حاجة مالمسلمين والعرب والمسيحيين و اليهود و البربر و الفينيقيين والسبنيور والأتراك واليونانيين والأفارقة وحتى الألمان والنرويجيين. ڨفصة، مهد الحضارة الكبسية إلي جات قبل قرطاج بياسر مازالت لتوة فيها ناس عينيهم زرق تللـّش كيف عينين ڨونداموند ملك الوندال إلي حكمها في وقت مالأوقات

نفسـّخوا تلاثة لاف سنا في ثانية؟ نعملوا هكة نقصيو أجزاء كاملة من ثقافتنا و شخصيتنا ولوغتنا و تراثنا الحضاري؟ آكاديميتنا إلي المفروض أعرق واحدة في المنطقة ويلزمها تنقد و تفسـّر تزيد تنشرالأفكار التوتاليتارية باش ننصهروا في عالم يرفض حق الاختلاف ويقاوموا؟ نتشبـّهوا بجماعة الخليج إلي لمـّوا قبايلهم توة أربعين سنة و فـّوروا البترول وقالوا أيـّا بربي نصنعوا دول؟ هكة نتصرفوا، أحنا إلي خرجوا من عندنا نسا و رجال ، مسلمين و غيرهم، دافعوا بكل قوة على أرضهم و هويتهم كيما حنبعل و الكاهنة و يوغرطة وأبو زكريا الحفصي و خير الدين وراضية حداد؟

Photo Quiz

Where were these pictures taken?

"رجـّعولنا " ألا خلّدي

آنا إنسان حفـّظوني شويـّة من ألا خلـّدي في الابتدائي ورغملـّي ما كنتش نفهم الكلمات متاعها كان يعجبني ياسر النشيد على خاطر نغمتو زاهية وفيها كليماكس هايل. هاه أسمعوا ماحلاه، والله الواحد لحمو قشعر. طمبك الفيانة التونسية شعر و لحن!ي

و من بعد لاطاح لادزوه قالولي يعيـّش ولدي أنساه هاك النشيد لاكان و لاصار، و حطـّولي في بلاصتو واحد آخر ناس تقول مصري و ناس تقول تونسي والنتيجة هي هي: نص الكلـّو حروف حلقية ثقيلة وميزانو دم-دم-دم-دم ماللـّول للإخـّر

إيذا كان المشكل "نخوض اللهيب لروح الحبيب زعيم الوطن" بدلوه البيت يا أخي، ماناش ناقصين شعراء في البلاد.. ما نعرفش آنا ..عوضوه ب"نخوض اللهيب لقرطاجنا تاج الوطن" مثلا. نحـّيوها زادة حكاية "أوطاننا و نداء الأخـّوة والاتحاد" ولا شنـّوة، يزيونا بلا ترهدين و قمع فكري. علاش نستعملوا نشيد وطني المفروض يلم التوانسة الكل مهما كانت اتجاهاتهم باش ندعموا أجندة سياسية معينة؟ تي بربي اتفرجوا في حوسة الدكتاتوريات و قولولي كان هاذم عباد يتغنـّى عليهم في نشيد رسمي ولا حتى في فزاني مرتاح

ولا تعرفوش كيفاه؟ أعملولنا نسخة بالدارجة من ألا خلّدي، هكاكة الناس الكل تفهموا النشيد القومي و تحسـّوا و تغنـّيه بيدها على صدرها .. ما تزفـّرش عليه كيما استانسنا للأسف نشوفوا

استفتاء: الأمـّة التونسية

فمـّة حاجة إسمها "الأمـّة التونسية"؟

..
إينعم. قبل قيام الجمهورية ما ننساوش إلي القرطاجيين والحفصيين و معظم بايات تونس كانوا حريصين على حماية خصوصية الشخصية التونسية و رموز الدولة-الأمـّة ، كيما العلم و الجيش و أجهزة التمثيل السياسي والديبلوماسي. ماننساوش زادة إلي شعبنا من أولو منسجم عرقيا وثقافيا و لغويا بخلاف برشة بلدان أخرين قضاو على التنوع الثقافي متاعهم باش الدولة تنجـّم تتوجد و تتحكـّم

...
لا. تونس الدولة و المجتمع صنيعة استعمارية جديدة وماهي إلا جزء مالأمـّة الحقيقية، أمـّة العرب مالمحيط للخليج. لوغتنا تحريف سيء للغة العربية الأصليـّة و فيها برشة كلمات دخيلة بفعل التواجد الأمازيغي والأوروبي. ثقافتنا هي نفسها ثقافة المغرب والسودان ومصر و قطر، بركة فـّرقنا الاستعمار

The right to die

I felt immensely touched by the case of that French woman, Chantal Sébire, who desperately appealed to the justice system to put an end to her suffering (a very painful and incurable brain tumour that extended to her face, badly disfiguring her) and die with dignity, painlessly, with the assistance of medical doctors. Apparently she had to kill herself after the judges firmly rejected her request.

I think we live in inherently oppressive societies. I think ‘people’ (governments, justice reps, but also ordinary citizens) take way too much liberty deciding what is good for the individual and what is unacceptable. They keep coming up with all kinds of generic explanations and moral judgements, often forgetting about the human being they are dealing with and preaching universal recipes of rightness and wrongness. It’s absolutely outrageous.

If you accept that someone's life and body belong to them then you must accept that their own death is also their property, no one else’s business. I see no point in forcing someone into an ordeal on the basis of what society thinks is best for her. When are people going to stop coercing each other?

" أحمد نجيب الشابي و "2009

تفرجت توة مدة على حوار مع أول شخص مالمعارضة القانونية رشـّح روحو رسميا لاستحقاق العام الجاي- المحامي أحمد نجيب الشابي. مانكذبش، فمة حاجات عجبوني ياسر في السيـّد: يظهر إنسان محترم، أفكارو منظـّمة و حجـّتو قوية من غير وقاحة وتجلطيم. أما برشة حاجات ما عجبونيش بالكل و كانو معمـّل يخوض الانتخابات بالحق (هاو يظهر فيه بش يتنحى شرط التلاثين تصحاحة ) يلزمو يبدل استراتيجيتو و علاش لا يعيـّن مختص في التسويق السياسي. ماهوش عيب

باهي..آهاوما الملاحظات متاعي

أ*أولا حملة "معا نحيي الأمل" هاذي تفكـّرني في شعارات كيما: "معا من أجل تونس" و " التونسي للتونسي رحمة" و " في كل يوم و فصل بينكم و بين تونس همزة وصل" إلى آخره... الشعارات هاذي وفات الصلوحية متاعها والعباد ولات تسمع فيها و تفلـّت. إلي يحب يدخل مغامرة الانتخابات يلزموا يدخلها بشعار مقنع يهز العباد ما يبردهمش. ويلزمو زادة يكون شعار بالتونسي

ا* بالمناسبة راهو الشعب التونسي (وكلامي هنا موجـّه لكل شخص ينشط في السياسة التونسية بالفقهي موش لجماعة التقدمي برك) مهما تحاولو تقتلو فيه التفـّرد والتميـّز بش يقعد يحكي بلوغتو، بالتونسي، لوغة مزيانة، معانيها قوية ياسر، و تمس العباد الكل مهما كانت مستوياتهم الإجتماعية. مانعرش وقتاش عقدتنا مالعرب والفرنسيس بش تتفك. واحد يحب يحطـّنا تحت كلاكل ساركوزي ولاخر يحب يردنا مقاطعة مصرية (تحبوشي زادة انناشدوا عمر بنڤو يتوحـّد معانا على أساس أحنا أفارقة و برويز مشرف على أساس أحنا مسلمين؟). قلتها و نعاودها: نهارة إلي أسلوب التواصل السياسي مع العباد في بلادنا يولي عفوي والأحزاب يحكيو مع التوانسة موش مع العرب والفرنسيس آتاوا نعطيوهم وذنينا و يولي يهمنا آش قاعدين يقولوا
.

ك* كلمة "أنا ماعنديش عصا سحرية" تواضع ماهوش في بلاصتو بالكل. إلـّي قادم على انتخابات يلزمو يعرف يجلب الناس برؤية واضحة، خطاب قوي، أسلوب جديد، أفكار جريئة، و خطـّة محكمة لتغييرات هيكلية نتايجها تتحـّس فيسع بعد الانتخاب. آه مالا كيفاش! سياسة المراحل والمليح يبطى يعيش راسك- دفنناها وقرينا عليها من هاك العام
.

قك* شد يسارك ياسي نجيب! ياخي توة ظهرو الاقتصاد الحر و ماخذة الريسك حاجات باهين؟ توة ولـّينا "الكلنا" مسلمين؟ توة ولات مسألة الدفاع هامة وقليل وين نحكيو عليها؟ ماكش ايديولوجي داكوردو..أما زادة ما تبداش تعوم عالأمواج الكل وتستنـّا في العباد الكل تتلم و تساندك! رد بالك: إيذا تحب ترضـّي الناس الكل راك تتعب ياسر و ما تحصـّل شي على خاطر الديمقراطية خيار الأغلبية موش خيار المجتمع الكل

ا*إلي قاللك إجبارية التدريب العسكري للأولاد والبنات عنوان مساواة غر بيك. المساواة تتحقق وقتلي يولي التدريب العسكري اختياري للناس الكل و مبدأ الاختيار بصيفة عامة، للرجال وللنسا، يولي مبدأ مقدس و مكرس في الدستور التونسي من غير حتى لبس

و* أخيرا، ياخي ويني السياسة الخارجية متاعك؟؟؟

..
نجيو توة للصحيح. أنا واحد مالناس نحتاط ياسر مالبرامج الانتخابية إلي تصور المجتمع التونسي ككتلة سوداء في حاجة لقيادة مستنيرة وأعصابي تفلت مني وقتلـّي نسمع عباد يقولو إلي الشعب التونسي يلزموا يتلم حول مشروع وإلا، وهنا الخطر الحقـّاني، شخص بعينو. يلزمنا نخرجوا من ثقافة " يحيى هاذاكا " و نفهموا إلي التوانسة في حاجة للتنوع موش للتكتـّل على خاطرالأمة التونسية ملمومة بطبيعتها من غير مزية فلان ولا أفكار فلتان الإصلاحية. و الشي هذايا ما يتحقق إلا بزوز شروط: أنـّو البرلمان يولـّي هو الكل في الكل و أنـّوالفرد يتحرر نهائيا مالسيطرة متاع المجموعة. أسلوب الحك والدك في المجتمع متاعنا يلزموا ياقف و كل واحد يركـّز على حياتو و يخلـّي غيرو يعيش كيما يحب. يلزم المساواة تكون أمام القانون أولا و آخرا و يلزم حجم الدولة يولـّي أصغر من نقبة الإبرة. هاذيا حكاية وزارة للنسا ووزارة للتأطير الثقافي ووزارة للتوجيه الديني ووزارة للي ما عندو وزارة يلزمها توفى. في كلمة يلزمنا الحرية، أحلى حاجة في الدنيا هي الحرية

وملاحظة أخرى أخيرة بربي: تونس تقعد رغم كل شي البلد الوحيد في المنطقة إللي أحنا فيها إلي ينجـّم يولـّي مثال يحتذى به في الديمقراطية وحقوق الإنسان. تونس كانت ديما سبـّاقة في كل شي و بش تقعد سبـّاقة بقدرة ربي. هاذي حاجة يلزمنا نتفطـّنولها و نحطـّوها في بالنا اليوم وغدوة

Happy Birthday Tunisia, here is your present:

I would like to thank my friend Slaim for working with me on the first issue of BIRD NEST, the publication of the Network of English-Speaking Tunisians. It is rather summary for the time being, but we very much expect subsequent issues to be more sophisticated in layout and content. We invite anyone who is interested in joining our team of editors to contact us by email. We will ask you to dedicate a tiny amount of your time to this activity as the BIRD NEST is published once every two months.

Happy Independence day to everyone! :)

كوسوفو: وقيـّت تونس تحدد موقفها

كوسوفو استقلـّت ماعندهاش برشة و يستحيل ترجع بالتوالي بما أنو الاستقلال هذا صار تحت سامي إشراف أمريكيا. بالطبيعة موش حب في كوسوفو أما زريقة تذكير لروسيا وحلفاءها بش كل واحد يشد بلاصتو. لاكن المهم أنو الاستقلال صار وهذا في حد ذاتو خبر هايل ياسر

..
برشة بلدان فيسع اعترفوا بكوسوفو وبعثوا السفراء. أما تونس ظاهر فيها اعتمدت سياسة وايت-أند-سي كيما يقول صديقنا زياد الجربي و بالنسبة ليا هذا اختيار غالط ميا في الميا. علاش؟

أولا، على خاطر الحياد يكثـّر مالأعداء موش مالأصحاب. ما تنجمش تكون محايد في العالم اليوم على خاطرك تجلب الشبهات. ما أحسنش مالوضوح وبصراحة صربيا لاهي توكـّل فينا لا تشـّرب وإيذا تغششت تنجـّم تشرب جو

..

ثانيا، أنـّك تتردد في الاعتراف بكوسوفو معناها إلي إنتي ضمنيا تبارك في المجازر إلي ارتكبوها الصرب في حق الأقليات في البلقان بما فيها الأقلية المسلمة. إلي ماتوا عباد ماهمش قطاطس و يلزمنا كتوانسة نتعاملو بكل حزم مع سياسات التنقية العرقية هاذم. وراهو من واجبنا ومصلحتنا ندافعوا على كل شعب مضطهد: واجب على خاطر أحنا كأمة دافعت على حقها في الوجود رغم تعدد الغزاة والأطماع نشكـّلوا مثال يحتذى به. و مصلحة على خاطر جيران السـّاس مافيها باس هوما زادة ياخذوا زريقة تذكير ساعة ساعة..يلزمهم يحطـّوا في بالهم إلي ما اننجمو نتمتعوا بالسلم و نخدموا مع بعضنا في المنطقة متاعنا إلا إذا نعيشوا مع بعضنا كأمم تحترم نفسها و تحترم غيرها. وهذاكة علاش تونس يلزمها تساند حق الشعب الصحراوي في الوجود مساندة تامة و غير مشروطة

..
ثالثا، نغلطوا ياسر كان نقعدوا نستناو في ردود فعل الدول العربية قال شنوا مانا الكلنا في الهوا سوا. برشة مالدول هاذوما موالين للكرملين و بيناتهم سلاح و بزنس.. ربي يهني سعيد بسعيدة أما أحنا اخترنا ثنية أخرى وهاكي هي الثنية الصحيحة. زيد على هذا ديبلوماسيتنا عريقة ومتطورة ياسر راهي و ما تنجمش تحط روحها في طنج الديبلوماسيات الأخرى. تونس طول عمرها تصول و تجول في الخارج و كريمة السفراء والموظفين الدوليين خرجت من عنا: المنجي سليم والشاذلي القليبي وحسن فضة و كمال مرجان ويوسف محمود و غيرهم و غيرهم.. آه مالا وينك إنتي؟ مالا بقطع النظر على مبارك و آل ثاني و القدافي آش قولهم يلزمنا نهنيوا شعب كوسوفو بالكرامة إلي تردتلوا و نطالبو بانفراج مماثل في فلسطين والتبت والصحراء و كل الشعوب إلي تعاني مالقمع والطغيان

.

مخ الهدرة: غدوة عيد الاستقلال متاعنا، ان شاءالله مبروك علينا، أما يلزمنا ديما نتفكروا غيرنا إلي مازال يقاوم في الاحتلال

Tony Blair to teach "religion"?

The former UK Prime minister, who has recently left the Anglican church and converted to catholicism, is to run a seminar on “Faith and globalisation” at Yale’s divinity school.

I do not wish to comment on that news; I never liked religious politicians and I think they are a real danger to world stability- especially when they think God talks to them. But my very sincere messsage to Mr Blair's students is: whatever this seminar is about, I would strongly suggest you take a parallel course in post-structuralism and discourse analysis.

Deconstruct, deconstruct my friends..

..سعود

المفروض الحكومات اتدين العنف بجميع أشكالو موش اتدين مجزرة و تسكت على مجازر..المفروض حياة عبد تساوي حياة عبد آخر مهما كانت جنسيتو ولا عرقو ولا المعتقد متاعو..المفروض تصويرة طفلة عمرها عشرين يوم في راسها كرتوشة اتدور الدنيا الكل و توري العباد شنية الحرب و لآنا مستوى تنجـّم تهبـّط الإنسان ..المفروض الناس تخدم أمخاخها شوية و تفهم إلي العنف ما يولـّد كان العنف ..المفروض الضو ما يتقصـّش والدوا ما يتقطعش على شعب أعزل..المفروض الإعلام يكون نزيه و مستقل وما يلعبش بالنار..المفروض تكون فمـّة مفاوضات و نيـّة صافية..المفروض الدين ما يدخلش و القانون الدولي يكون هو الفاصل

..

أمـّا أعطيني شكون يفهمك