شويّة نصايح هامّين لكل عضو في تن.بلوغ

زميلي و زميلتي، خوذها نصيحة من عندي وآتاوا تشوف قداش تولّي تستمتع بالتدوين وتستفاد منّو: أخرج مالبلوغسفير التونسية من غير ما تخرج من تن.بلوغ. يحب يقول:ل

.

ما تصوحب حد و ما تعادي حد. ما تشكر حد و ما تذم حد على حاجة كتبها. إلّي يقدح فيك إحسبوا موش موجود وإلّي يشكرك ما تشكروش بدورك على شكرو ليك. باختصار لا تترهدن ولا تتجلطم

.

ما تحاول تُثبت حتى شي للعباد إلّي يقراولك وكان الروكونيسنس ناقصتّك في الدنيا عالجها في الدنيا

.
اتفكّر إلّي مدوّنتك نكتة في محيط -لاهي باش تحل مشاكل تونس ولاهي باش تحقق رجّة فكريّة في البلاد ولو إنتي يظهرولك تدويناتك قويّين برشة

.

إقلب الصحن وقتلّي يلزم واتفكّر إلّي الحديث في موضوع معيّن دون سواه يخلق التطرّف والعنف

.

عمرك لا تكتب بوست جوابا على بوست آخر. كيف تكتب ما تخمّم في حد غير في روحك

.

خمّم ألف مرّة قبل ما تشارك في تظاهرة جماعية وما تعمل حتى حاجة موش إنتي قرّرتها أو مافيهاش إضافة واضحة من عندك

.

عمرك ما تقابل مدوّنين في الدنيا أكثر من مرّة في العام كان واتات. بقية الوقت اِستكفى بروحك

.

قول كل حاجة عندك في البوست وخلّي إجاباتك عالتعليقات إلّي تجيك مقتضبة وهادفة. خلّي تعليقاتك عالمدونات الأخرين مختصرة وهادفة زادة. ما تعتذرش على حاجة قلتها وما تستنّاش من حد أنّو يعتذرلك

.

ماتعملش كليك. ما تصوّت لحد وما تصوّت لحد ضد حد. ما تلوّجش على صداقات أونلاين. بالعربي

get a life

.

إحتاط مالنّاس إلّي تخمّم كيفك وما تحتاطش مالنّاس إلّي تجي ضدّك. خاطر إلّي يخمّم كيفك نهارة إلّي ما يلقاكش معاه في الخط يدور في الحياصة وتولّي بيك وعليك

كان ماكش مستعد تقبل مبدأ أنّو الناس الكل عندها نفس الحق في التواجد معاك في تن.بلوغ حتى العباد إلي 'ما تهضمهمش' بطّل التدوين خير ماهوش متاعك

موش لازم تظهّر روحك متربي ونفس مومنة كانك أساسا قليل الحيا وموش لازم تلعب دورالخليقة كان التزوفير خاطيك. كانك مستانس تحكي بلوغة سوقية في الدنيا ميسالش إستعملها في مدوّنتك و كان لوغتك في الدنيا مصقولة خليك مصقول عالأنترنت زادة. المهم ما تخلّطش اللوغتين. خلّي كل واحد يحكي بالطريقة إلّي مستانس بيها وعطيان الدروس من كل شيرة يوفى
.

كانك متديّن صحّة . كانك ما تمّن بشي صحّة . بركة إنتي فرحان

أخيرا هدّي من روعك- التدوين ماهو إلا كلام في نهاية الأمر

.

آكاهو..واتفكّرني