شكون يحب فمّ 'شوربة ماجي بلحم الضأن '؟

ِجريدة الصباح تحقر اللسان التونسي، هاذي حاجة معروفة ومستانسين بيها. كل مرّة تصادف 'يغلط' صحافي و يحطّ جملة تونسية في مقال، لازم يعلّقلها ظفريْن و يعقّب عليها بجملة إزدرائية كيما: ''وكما يقول البعض بالعامّية'' و إلاّ 'كما يحلو للبعض تسميتها'. تقول عليه الشعب التونسي مستانس يتخاطب بالفُقهي وال'بعض' من أفرادو يستعملوا كلمات دَخيلة و هامشية من جهلهم و ضلالهم .
..
باهي ياسيدي ماعليناش- نفرضوا الناس الكل تتكلّم الفصحى في بلادنا و إلّي الدارجة لوغة دَخيلة ينبغي التصدّي ليها و للناطقين بيها.
..
علاش توّة أختي العزيزة تسمّيلي في الماكلة بآسامي غريبة عالفُصحى نفسها؟ في بالي الشربة تتسمّى ''حساء'' موش شوربة. وشنيّة غريوز هاذي إلّي ما لقيتها في حتى معجم؟ و ماكارونة و تين مجفف وزيادة في نسبة الجليريسدات وفوضى؟؟؟ توّة بربي آش فيها لو كان تقول شربة بالعلّوش و كرموس شايح و مقرونة و سُكُّر في الدم؟ كلام سوقي هذا ما يتكتبش في الجرايد؟
....
ريناكم تقمعوا في الدارجة لصالح الفُصحى قلنا داكوردو وسكتنا، آما ماتجيوش توّة تفرضوا علينا التسميات متاع الشرق وقتلّي هوما نفسهم عامّيات (ماكم زعام تحكيو من منطلق هذا عامّي وهذا فصيح؟). تحب تكتب عالغريوز والشوربة يعيّش أختي برّه اِكتِب عليهم في البلدان إلّي تعرفهم و اتطيّبهم أحنا هنا عنّا كوجينتنا و كلامنا