العُروبة تحت المِجهر

عندي واحد صاحبي في تونس ينتمي لحزب سياسي معارض...أمّا قانوني (أوف انجّم نواصل التدوينة..غصرة واتعدّات هههه). عادَا بالنسبة ليه حكاية ' الهُوية العَرَبية' ..مانعرشّ كيفاش نفسّرلكم..معناها تنجّم تُنكُر كُرَويّة الأرض في حضورو ويسمعك ويحكي معاك أمّا صعيب ياسر تنقد فكرة الإنتماء لل'وطن العَربي' ولاّ تجادل فيها معاه. قلت عاد خلّيني نستجرى نفرّك هالرّمانة متاع العُروبة إلّي لْطخْها علينا حاكِم مصر توّة خمسين سنا ونشوف منين جا الغرام بيها
.

في الحقيقة أنا وصلت في فترة من حياتي نامّن بالمنجدّ إلّي هويتي عَربية ومستغرب كيفاش ماعملناش دولة عُظمى من المحيط إلى الخليج تنافس الغرب المتقدّم..وهذا شيْ يدُلّ أوّلا على سذاجتي وقلّة خبرتي في الدِنيا..وثانيا يدل على نجاح السياسات والخطابات الشُمولية إلّي تكوّنت في المنطقة بعد الّي تسمى 'الاستقلال' وكبر معاها الجيل متاعي (وهنا نتذكّر واحد صاحبي آخر اقترح ما عادش نحتفلوا بعشرين مارس خاطرو ما عندو حتى معنى في تاريخنا الطويل- وأنا موافقو). قلت مالا السياسات هاذم كان الهدف منها الحفاظ على مصالح الأطراف الّي استحوذت على السلطة من غير انتخابات بعد 'خروج' المستعمر الأوروبي وتفرضت من خلالها فكرة الشرعية 'التاريخية' إلي حكى عليها ماني هنا. الشي هذا صار في جُلّ البلدان الناطقة بالعربية

..
الناطقة بالعربية. موش العربية. على خاطر موش العباد الكل في المنطقة إلّي جينا فيها إثنيا عرب ولوْ برشة منهم يتكلّموا الفُصحى كلوغة ثانية و ثالثة..وفي الحقيقة العرب أقليّة في شمال افريقيا بربرية الطبع والتقليد ولِذا مافمّاش علاش يتقمع الحضور الأمازيغي والأسْود في المنطقة بحُجّة سُمُوّ العِرق العربي و اللّوغة الفُصحى. التهميش يزيد يشجّع العباد على التعبير عن ذاتهم موش العكس وهذا حق إنساني بديهي..وهاكا علاش اليوم أغلبية المدوّنين التوانسة يِكتبوا بالدارجة في قطيعة تامّة مع أسلوب الخطاب في الصحافة الرسمية و نلقاو زادة صفحة ويكيبيديا لكل بلاد شمال إفريقية، بما فيهم تونس، بلسان القبايل. تي حتى مصر، إلّي أعلنت روحها 'أهم دولة في المنطقة والناطقة الرسمية باُسم العرب' مانعرفش بآنا حق وعلى آنا أساس، الناس فيها بداو يفيقوا على وضعهم. مثلا نلقاو عندهم ويكيبيديا بالمصري والروايات إلّي خارجين جدُد مكتوبين بالمصري زادة على خاطرها لوغة قايمة الذات بصرفها ونحوها، كيما لوغتنا التونسية. الاعتراف بالخصوصية والإحتفال بيها حاجة هايلة وهذاكا مصدر القوّة الحقاني
.
مخ الهدرة؟ أربعة حاجات: العُروبة فكرة سياسية حياتها قصيرة على خاطرها مبنية على مصالح شخصية موش على طموح مُشتَرَك; الفُصحى لوغة نخبوية استخدموها جماعة السياسة في كل بلاد في المنطقة لتغريب الشعوب عن قضاياهم الحقانين; صهر الثقافات وقمعها يزيد يقوّي الاختلاف ما يُلغيهش; و الشُمولية فكرة عنصرية يلزم نقاوموها بجميع الوسايل. إلّي تفكّروا بالمبادئ البسيطة هاذم مالمناصرين لفكرة العُروبة يتغشّش و يقللك إنتي تحب تخلق بلبلة و انقسام في المنطقة وتخلّينا فريسة ساهلة للإمبريالية متاع الغرب هههه. تقول عليه الديسكور المهيمِن متاع العُروبة و اُحاديّة الهويّة ماهوش هو بيدو قِمّة الإمبريالية