آمال.. و تصويرتها..والقرضاوي

.آمال.. بش نحل قوس في ما يخص الفورمة: أوّلا موش لازم تأستذني- أنا مازلت طالب وأرجعلي بعد تلاثين سنا كان عشنا وشوف وشوف كان ولّيت أستاذ. ثانيا ما نظاهرليش إنتِ عندك صلاحية التعليق على السيرة الذاتية متاعي. تعرفني؟ قريت معايا؟ قرّيتني؟ امتحنتني؟ تعرفني فاش نقرى من أساسو؟ إذا كانت إجابتك على أحد هذه الأسئلة أو كلها ب'لا' فمن فضلك اقتصر على محتوى الفكرة إلّي عبّرت عليها و موش لازم تربطها بالبيوغرافيا متاعي. على خاطر فمّة شكون أحقّ و أدرى منّك بالتقييم

باهي نجيو للمحتوى- إذا كان فمّة ما يتحكى من أساسو إجابة على تدوينتك. أنا نتمنّى إلّي الناس إلي صوّتولك تكون كونتواتهم وهمية كيما نتصوّر ماكانش بالحق شي يفجع. فكّرتني في محاكم السَّحَرة إلي كانت تتنصب في أوروبا القرون الوسطى والحُجج الآبسورد متاعها. خاصة التصويرة إلي حطيتها. واللهِ العظيم نحشم نورّيها لواحد عُمرو أربعة سنين موش نحاجج بيها الكبار. آمال، بجدّك ولاّ تفدلك؟؟ هاكي الأرض؟ هاكي الشمس؟ فمّة طيارة في الدنيا تخرج مالآتموسفير وتوصل تعمل تونجونت مع الأرض؟ علاه أختي إنتي والقرضاوي تسافروا في صاروخ ولاّ ساتليت ههههه

الحاجات هاذم بديهيين برشة و مافيهم حتى اختصاص. وهاو قدّامك شيما أقرب للواقع: أرضك أصغر بياسر مالشمس وطيّارتك إلي تطير في القطب الجنوبي باتجاه قطر ههه نكتة مرتفعة دوبلاش عالأرض. والارتفاع، نعاود ونقول للّي يسمع في الشعوذة، ما يهمّش. المهم الموسيون متاع الأرض في وقت معيّن. حق من حقوقك أنّك تكون فان متاع القرضاوي- ربي يهنّي سْعيد بسّعيدة. أمّا عالأقل استتر قال الراجل