رجال' الدين؟ أيْ وينهم النسا؟؟'

ما نعتبرش نفسي فيمينيست بالمعنى السياسي للكِلمة أمّا نامّن ياسر بأفكار بسيطة كيما العدل و المُساواة وتكافؤ الفُرص. الديانات الكل في العالم، سماوية و غيرها، بما فيها الإسلام، تأويلها مفصّل تفصيل على قياس الراجل ونظرتو ومصالحو في الحياة. يعني بقطع النظر على مسألة هل أنّي المرا في الاسلام عندها حقوق كيما الراجل ولاّ أقل، أساسا العباد إلي أطّرو المعتقد في الماضي و الحاضر تقريبا الكلهم رجال وبالطبيعة الفرسيون إلّي يجي بيها الدين مهما كانت ليبرالية و مساندة للمرا ما تنجّم تكون كان ذكورية وبالتالي ناقصة شطر الحكاية

فمّاشي نسا تعمل تفاسير للقرآن؟ فمّاشي نسا اتطلّع فتاوي؟ فمّاشي نسا عندها نفوذ إعلامي؟ فمّاشي نسا تُخطُب في الجامع؟ كيف تعدّي السيّد محمد مشفر في التلفزة علاش ما تعدّيش معاه السيدة سلوى الشرفي؟ كيف استدعيت يوسف القرضاوي علاش ما استدعيتش زادة نوال السعداوي تعرّف بأعمالها؟ هو حتى في انتخابات ديمقراطية كل مترشح ياخو نفس الفرصة في التعبير وأضعف الإيمان في دولة تحب بالسيف توجّه الممارسة العقائدية هو أنّها تعطي الناس فرصة بش يسمعوا آراء نَسوية آكاديمية بالإضافة للآراء الرجالية. نعاود، آكاديمية، موش شعبويّة. معناها نسا يعرفوا ينقدوا بطريقة عقلانية بعيدة على لوغة حلال و حرام و أين أنت منه وعلامات الساعة الصغرى تحققت