" ووه، راجل يشطح؟؟"

فمّة فيديو تبعثتلي مرّتين اليوما عالفايسبوك من زوز أصحاب، بنيّة و ولد، يستنكروا كيفاش راجل يشطح في أوتيل عالدربوكة 'كيما المرا' و يتأسّفوا على حال السياحة في تونس

.
كيف تفرّجت عالفيديو ما لقيت فيها حتّى شي يحشّم. أنا نحب الرقص برشة و البرفورمنس ظهرتلي مزيانة على خاطر تحسّ ريتم الموسيقى قاعد يسري بطبيعتو في بدن الرّاقص و هاذي حاجة قليل عباد ينجحوا فيها. الشطحة جاتني إفريقية أكثر مِنّي شرقية و على كل حال مختلفة جذريّا على شطحة المرا بما أنو بدنها وتعبيرها مختلفين زادة

..
أنا نتأسف كيف نرى عباد من عمري نظرتها للدنيا (بقطع النظر على ذوق كل واحد منّا) مبنية على أساس أنّو الشطيح متاع نسا والقعاد عالقهوة للرجال و غير ذلك مالمعتقدات الآبسورد. و نعاود و نقول إلّي جدودي يرحمهم كانوا عايشين في مناخ متفتّح أكثر مالمناخ إلّي عايش فيه أنا توّة. دايور نذكّركم إلّي سهام بلخوجة ولات تذوق في الأمرّين بش تقدّم عُروض بفرقتها المتكونة من بنات وولاد وإلّي هاذي حاجة ما هيش مقبولة بالكل في مجتمع متحضّر

مثال متاع صفحة ويكيبيديا بالتونسي

Republic of Tunis/الإسم: جمهورية تونس

.

البلاصة: شمال إفريقيا، حدود مع التزاير و ليبيا

الإمّالي: حداش ن مليون

العاصمة: قرطاج

الكُبر: 164000 كم2

النشيد الرسمي: ألاخلِّدي

اللوغة الرسمية: التونسي

لوغات أخرين معترف بيهم: الفصحى، الأنقليز

الولايات: 4- قرطاج الكبيرة * باجة-الشمال * قفصة-الوسط * مدنين-الجنوب

المنظمات إلّي داخلة فيهم: الأمم المتحدة، بيرو التجارة متاع شمال إفريقيا، المنظمة العالمية متاع التجارة

الفيشتات: 25 جويلية نهار الجمهورية. آكاهو

الفلوس: دينار = ميات سنتيم

نزاعات برّانين: ما فمّاش

Fed up with Aljazeera

Is it a coincidence that Aljazeera’s ‘news’ in English are totally different from what is made available in Arabic?

This morning the Arabic-speaking website discussed how, let me transltate it literally, “Britons are now turning to Islam to settle their court cases”. The article claims that an increasing number of non-muslims in the UK choose to go through Islamic tribunals because they are ‘less complicated and less formal’ than civil courts. Why is this (rather significant isn’t it?) piece of information not available on the English website?

Yes mass media, including CNN and the BBC, manipulate public opinion and I totally mistrust them. But Aljazeera does a few more things in addition: it fulfills a religious-political agenda, it often makes news up, it abuses of the emotional aspect of events involving casualties, it turns the most mundane news into religious controversies, and it promotes radical ideas. Just go through any set of readers’ comments and see the kind of horrors that are taken as ‘feedback’. Look at the sort of questions asked in Aljazeera polls and the response they get. It’s absolutely appalling.

جمهورية

المدّة الإخّرة جريدة الصباح بدات تاخو في منحى ماهوش عاجبني برشة. يعني..أنا عادة ما نقرى حتى جريدة تونسية خلاف الصباح على خاطر ما فمّة ما يتقرى في ال...'جرايد'...الأخرين. لكن مستوى الكتيبة والمواضيع المطروحة متاع الصباح بداو يذكّروني بالصريح و الحدث ويظهرلي بش نهجرها عن قريب كان استفحل بيها الشي. كنت حكيت على مقال الوزير إلّي صرّح أنّو طاهر بما يكفي لمباركة زيادة في الشهاري و مقال 'أنسنة' التعذيب و نبرة التملّح متاع الكاتب قدّام إعتراف التليسي باقتراف الجريمة. البارح قريت زوز مقالات جدد يصبّوا في نفس الخانة

.
لولاني عبارة على ميا-كولبا متاع وزير الخدمة العمومية إلّي 'حلف' في 'قبة البرلمان' أنّو يتألّم كل ما يخلّص مدير الأنتريت. قدّاش بش نحلّل و قدّاش بش انناقش هنا؟ ما نعرفش كان قاعدين بالفعل نحكيو على قبة البرلمان متاع باردو ولا قبّة الصخرة متاع فلسطين. ياخي فاش قام الحلفان في موضوع يخص السياسة العامة متاع الدّولة؟ وعلاش وزير، موظف في الدولة التونسية وموش عند جمعية الأم تيريزا، يتناول السياسة من منظور عاطفي كيمن هكّة؟

ما فمّاش عواطف في السياسة و هاذي حاجة يلزمنا نفهموها الناس الكل- حكومة و شعبا. فمّة قرارات يلزمها تتّاخذ و تتنفّذ وإلّي خذا قرار و ظهر للعباد غالط يبيّن أنّو هذاكة هو الاختيار الصحيح أو يقدّم استقالتو كيما يصير في البلدان العادية. وفي موضوع كيما الأنتريت أنا واحد مالناس ما نرى حتى مشكل في تسريح المديرين إلّي خلطوا للستّين حتى قبل الوقت بعامين و تلاثة. ياخي ياخذوا وقتهم و وقت غيرهم؟؟؟ وكان عالكفاءة إلّي يحس روحو كفؤ بالحق و عندو أكثر أفكار مالشبّان المتخرجين ينجّم يحل وحدو شريكة متاع استشارات وربّي يعينو. أمّا هاذي حكاية يشدلك مسمار في حيط حتّى للخمسة وستّين وأزيد على خاطر الكرهبة و بونوات الإيسُنس، يلزمها توفى. يخرج في الستّين وموش لازم البكا

.
المقال الثاني من مرقو باين عشاه. قاللك 'امرأة عدل إشهاد تحرّر عقود الزواج.. هل يجوز شرعا؟' ومفتي يفتي و عباد تعطي في رايها و الدنيا محروبة.أنا كيف نقرى حاجة كيمن هكّة نخاف على مستقبل بنتي نهار آخر و نتساءل يا لندرى بش تنجّم تتمتّع بالكرامة النسبية إلّي توفّرت لممّاتي توّة خمسين سنا؟ موش حاجة تخوّف أنّي نخمم في حاجة كيمن هكّة؟ موش حاجة تخوّف أني نفس البلاد إلّي جابت الكاهنة وعزيزة عثمانة وتوحيدة بالشيخ توْة تناقش يا لندرى تنجّم المرا تخدم عدول وإلا لا؟ وخاصّة، ما يخوّفكمش أنّهم النسا يسمعوا ويراو الشي هذا و يقعدوا ساكتين؟

خمّموا

Non à la peine capitale

J'ai toujours été, je suis, et je resterai foncièrement opposé à la peine de mort.

التعذيب وحرقان السبورتيف و قذف الأعراض

عندي برشة حاجات نحب نحكي عليهم والتدوين ما عادش رافعهم. فمّة خاصة تلاثة مواضيع جلبولي اهتمامي المدّة الإخّرة

.
أوّلا مقال هبط نهار الأحد إلّي فات في في جريدة الصباح يحكي على التعذيب في الفترة البورڨيبية. المقال ،رغم إلّي زعمة زعمة خرج شوية مالإطار الرومنطيقي إلي برشة عباد ينسبوه لأيام بورڨيبة، إلا أنّو نرفزني لأقصى درجة. يعني الشخص هذا - إسم الشهرة متاعو التليسي و إسمو الحقاني بن نصير- مارس التعذيب ضد اليوسفيين و جاي توّة بكل صُحّة رقعة يقول إنو هذا يدخل في إطار النضال. نضال شكون و ضد شكون؟؟ برّه لوّج عليه. آش عندي فيه أنا كان البوديڨارد متاع بورڨيبة وإلا حتّى جبّاد الشّاس متاع كينيدي؟؟ الشخص هذا شارك في تعذيب ممنهج ويلزموا يتعاقب موش يعطي انطباعاتو عالحركة الوطنية كأيّها الناس. سواء الجريمة قديمة والضحايا موتى أو حيّين ما يهمّش، يلزموا يتحاكم وياخذ جزاه

.
الموضوع الثاني هو حرقان رياضيين توانسة للغرب في حين أنهم سافروا للمشاركة في منافسات دولية. أنا في العادة نتعاطف مع الحرّاقة رغم أنّي نرفض الهجرة السرية كمبدأ، لكن المرة هاذي ما تعاطفتش بالكل. علاش؟ على خاطر الناس هاذوما وقتلّي خرجوا، ما مشاوش باٌسمهم و على كاستهم وفي فلوكة منقوبة. خرجوا في طيّارة تونيسار بش يمثّلوا الجمهورية التونسية في تظاهرة دولية على حساب دافع الضرايب التونسي. يعني حرقتهم فيها تلاثة جرايم في نفس الوقت: فيها خيانة للبلاد إلي بعثتّك، و تحيّل عالناس إلي استدعاوك، و سرقة لفلوس المستحق التونسي إلي صرف على تكوينك و على سفرك و إقامتك في الخارج. وهنا أكيد أنّو سياسة الدولة في مجال الرياضة تحتاج لمراجعة جذرية وأنا نقترح أتّا كمواطنين نفرضوا عالدولة سيستام متاع مُساءلة في شكل أوديت على ميزانية الرياضة وميزانية كل وزارة كيما الأوديت المفروض عالشركات. هاذوما فلوس العباد إلّي تقوم تخدم على روحها كل صباح وماهيش مخصصة لتمويل مشاريع الهجرة متاع زيد و عمر. بالعربي إلّي يحب يحرق يتفضّل، أمّا بفلوسو موش بفلوس الشعب

.
الموضوع الثالث هو ثقافة القذف في أعراض الناس إلّي هي خاصية من خاصيات المجتمعات المكبوتة و تفضح عُقدها الجنسية و كرهها للمرا و كرهها للإنسان تو-كور. التُهم هاذوما متاع الرّذيلة و الفساد هي تنابر تِلصق على كل من تسوّللها نفسها أو تسوّلّو نفسو ينجح شويّة، يستغنى شويّة، يمشي شويّة ضد التيّار، يقول رايو شويّة، يعمل أسرة فرحانة شويّة. الحاجة إلّي تبهّتني هو أنّو العباد إلّي تبدى تقشقش في حناكها في سيرة هذا وهاكي وتعمل فيها مصدومة من الإنحلال الأخلاقي يبداو هوما نفسهم أفسد خلق ربّي. ماو يقللك الهامل حاشاكم يسخايب الناس الكل هِمّال كيفو! أمّا موش هاذي المشكلة الحقّانية بالنسبة ليّا. المشكلة هي وضعيّة الإنسان وخاصّة وضعيّة المرا إلّي قاعدة توخّر في البلاد هاذي وحدّ ماهو مهتم. نستحضر ميات حكاية في السياق هذا أما ماعنديش ليهم بلاصة، آتاوا ممكن نجبد عليهم في تدوينات أخرى

تقريب البحر من ولايات الجنوب الغربي

شهاب نشر التصويرة هاذي في الفايسبوك ومعاها 'مناشدة' لتقريب البحر من دوز أو دعم أسعار المكيفات

أخطانا مالتفدليك- أنا واحد مالناس ماذابيا لوكان فعلا يتم مشروع تعبية شط الجريد بماء البحر. المشروع هذا إلي تخطّط في القرن تسعطاش و عمرو ما تنفّذ قال شنوّة الشط عالي سطّاش ميترو عالبحر. إيه عاد شبيه؟ نشوفوا حل البلاد ماهيش ناقصة مهندسين. إذا كان بلاد كيما مصر حفرولها قنال السويس و تحوّلت إفريقيا لجزيرة، بش يكيدنا 'قنيّل' متاع تلاثين كيلومتر في خليج قابس يفرهد عالعباد و يخلق موارد رزق في أربعة ولايات؟