بعد هايتي:عندناشي استراتيجية وطنية لتوقّي الزلازل في تونس؟

بعد المأساة إلي عاشتها هايتي، يظهرلي هاذي فرصة بش نراجعو نفسنا في تونس ونشوفوا رواحنا إلى أيّ مدى أحنا مستعدّين لمجابهة كوارث مالنوع هذا. ثقافة ربّي يستر و سبّق الخير ما تمثّلش استراتيجية ناجعة في نظري

.
أحنا من غير شك جايّين في منطقة زلازل مخطرة. كل مرة نخزر لحي النصر مالفوق ما إنجمش نمنع روحي من تخيل عواقب رجة أرضية على حي كيمن هذا من نوع زلزال بومرداس في الدزاير توّة سبعة سنين و زلزال سيسيليا في القرن الماضي.. والزوز رجّات هاذم بالمناسبة كانوا في قوّة زلزال هايتي. سؤالي للمسؤولين متاع وزارة التخطيط ومهندسي المعمار وشركات التأمين هو: حسب رايكم هالبني الفوضوي و العمارات هاذم إلْي واقفين كي باكوات الوقيد على أرض طينية ينجموا يقاوموا لا يقدّر زلزال بقوّة ستة ولا سبعة؟ إذا كان ينجّموا سامحوني في القلق. وإذا كان ما ينجموش قولولي مالا شكون فيكم مستعد يتحمل مسؤولية غياب شروط السلامة في إنشاء الأحياء السكنية الجديدة هذي؟