تخريب..وتخلّف

أنا كبرت في مدينة منزل بورقيبة و عندي ذكريات خاصّة جدّا معاها. ذكرياتي الكل تقريبا مرتبطة أساسا بالطبيعة. المناخ متاع المنطقة شبه رطب و مختلف ياسر عالمناخ متاع العاصمة رغم إلّي ما تبعدش عليها أكثر من ستّين كيلومتر. فصل الشتا كان ممطر برشة، و الربيع كان ربيع حقّاني تشمّ ريحتو في الهوا، والصيف ماكانش سخون. بلاد خضرا دايرين بيها بحيرة بنزرت و محميّة إشكل وغابة قِنقلة (بتلاثة نكت عالقَ) وسواني ماطر. الحاجة الوحيدة إلْي كانت معكّرة جودة الحياة هو معمل الفولاذ والمدخنة متاعو

لكن اليوم فمّة أكثر من حاجة معكّرة جودة الحياة في منزل بورقيبة. الدّيار المزيانين إلّي كانوا مبنيّين بالقرمود الأحمر طاحوا لقلّة الاعتناء بيهم. الأحياء العشوائية كبرت، معمل الفولاذ بلغ درجة من الاهتراء على مستوى الشكل الخارجي و على مستوى الأداء الاقتصادي خلاّتوا فالس و غير قابل للخوصصة. و توّة البلديّة قرّرت بش تكمّل على مرمّتها البلاد بقصّان أشجار قِنقلة المُعمّرة

أحنا التوانسة لاهين النهار كامل نلِمّوا في التقارير الدوليّة، هذا رتّبنا والآخر صنّفنا، وناسين إلّي أحنا قاعدين نتعاملوا مع البيئة بهَمَجيّة تتجاوز كافّة التصنيفات. علاش توّة مالا قاعدين نجوّحوا على التصحّر و الانجراف وضعف الموارد البيئية؟أحنا السبب في تدهور مناخنا وما نلوموا كان رواحنا

[تصويرة المجموعة متاع الفايسبوك]