أيّ شراكة؟

في الأشهرة إلّي فاتو قاعدين نلاحظوا في مشاكل كبيرة ياسر في البلدان الأوروبية
:
إفلاس حكومة اليونان إلّي اقترضت أكثر من قدرتها و تلاعبت باحصائياتها الرسمية

.

معاناة البرتغال و اسبانيا و إيطاليا وإيرلندا من أزمة سيولة على الأرجح أنها بش تتعقد على الطريقة اليونانية في المدّة الجايّة

.

أزمة ثيقة في الحكومة البلجيكية زادت عمّقت الهُوّة بين الفرنكوفون و الفلامون ومانستغربش لوكان البلاد هاكي تتقسمْ في المستقبل

.

شلل تام في الحركة الجويّة الأوروبية لمدّة أسبوع تسبب فيه بركان ومازالت تونيسار تعاني مالعواقب متاعو

.

تناحر الأوروبيين فيما بينهم على إثر أزمة التأشيرات بين سويسرا و ليبيا نظرا لتعدد مصالحهم في قطاعي النفط والغاز. المُلفت للانتباه هو أنّو بلدان شنغن الكل جاو ضد سويسرا و رضخوا للشروط إلّي حطّتها ليبيا بلاد الستة ملاين من غير نقاش

-------
أنا كيف نرى حاجات كيمن هكّة نتسائل: هل من الحِكمة أنّنا نحطّو اقتصادنا تحت رحمة بلدان مضطربة كيمن هكّة؟ هل اعتمادنا على اليورو في مدخراتنا من العملة الصعبة و في مبادلاتنا التجارية صائب؟ شنوّة جابتّلنا ال'شراكة' مع الإتحاد الأوروبي غير المشاكل؟علاش يلزِم اقتصادنا يتأزّم بتأزّم اقتصادهم هوما؟

الشراكة مع أوروبا ما عاد عندها حتى معنى وفي بلاصة لا نزيدوا نغرّقوا رواحنا بالاعتماد عليهم واكتساب صيفة الشريك المتقدّم لابدّ من تطوير علاقتنا مع بلدان أخرى شابّة واقتصادها متين و وواعد كيما الهند و أميركا اللاتينية و الولايات المتحدة الأمريكية. يلزم ننقذوا رواحنا قبل لا يفوت الفوت