من أجل أن يكون ختان الذكور خيار فردي موش فرض

ختان الذكور (ما نحبّش نحكي على ختان الإناث باعتبارو غريب علينا من حسن الحظ) - أو ما يُعبّر عنّو جِزافا بال'طهارة'- من العادات السيّئة المتغلغلة في المجتمعات المسلمة بما فيها المجتمع التونسي. العادة هاذي كيفها كيف تغطية واجهات المطاعم في رمضان (إلّي كنت أشرت ليها في نقاش مسألة الحجب في تونس) لم يرِد فيها أيّ نص ديني صريح لا في القرآن و لا في السنّة، باستثناء حديث واحد يقول أنّو الختان 'سُنّة للرجال و مكرمة للنسا' وتبقى صحّتو محل جدال. في المقابل فمّة آية كريمة تقول:' لقد خلقنا الإنسان في أحسن تقويم'. يظهرلي ما فماش أوضح من هكّة

لكن بقطع النظر عن هل أنّو الختان فرض أو سُنّة يظهرلي كان نخزروا للمسألة هاذي من زاوية عقلانية، أو حتى دينية بحتة ميسالش، يعني.. الواحد ما ينجّم كان يتسائل: علاش ربّي يخلق في الانسان قلفة من أصلو بش من بعد يجبرنا نقصّوها؟ علاش ما نجنّبوش الصغار نزيف ووجيعة قويّة تستمرّ لفترة طويلة، برشة ناس كيفي يتفكّروها؟ علاش ما نحترموش جسم الانسان و علاش ما يكونش للرجال الحق في امتلاك أجسادهم؟ علاش ما يكونش للرجال الاختيار أنّهم يطهّروا أو ما يطهّروش في عمر ينجّموا ياخذوا فيه القرار هذا؟

في رايي يلزم القانون التونسي يحمي القُصّر من الانتهاك الجسدي المفروض عليهم بحكم العادة. باٌستثناء الحالات الطِبيّة لا بدّ من منع الختان على من كانت أعمارهم أقل مالثمنطاش